«Հայաստանի Սևազգեստ Կանայք» շարժման ամենամյա հանդիպում
Հասարակություն առանց Բռնության» ՀԿ հերթական անգամ հնարավորություն է ընձեռում մարզերի երիտասարդ կանանց ու աղջիկներին իրենց ակտիվ մասնակցությունն ունենալ Հայաստանում «Սևազգեստ Կանայք» միջազգային շարժման տարածմանը՝ խթանելով կին-խաղաղարարի կերպարի ձևավորումը, կնոջ ներուժի ու կարողությունների զարգացումը՝ ի նպաստ հակամարտությունների լուծման: Այդ նպատակով սույն թվականի հունիսի 27-28-ը իրականացնում է հանդիպում «Հայաստանի Սևազգեստ Կանայք» շարժման շրջանակներում:
Այս անգամ մասնակիցներին կհյուրընկալի Երևան քաղաքը՝ նախատեսված հանդիպման շրջանակներում ներառելով մարզերում «Կին-խաղաղարարների դերի բարձացումը կոնֆլիկտային իրավիճակներում. Սևազգեստ կանանց շարժման հզորացումը Հայաստանում» ծրագրի շրջանակներում իրականացված երկօրյա քաղաքացիական ֆորումներին ու դրանց հաջորդած հանրային միջոցառումներին մասնակցած երիտասարդ կանանց ու աղջիկներին: Վերոնշյալ միջոցառումներին մասնակցությունն արդեն իսկ որոշակի գիտելիքներ ու հմտությունն է տվել վերջիններիս, որոնք էլ նրանք մեծ խանդավառությամբ պատրաստ են կիսել միմյանց հետ առաջիկա հանդիպման ընթացքում:
Հանդիպման նպատակը «Հայաստանի Սևազգեստ Կանայք» շարժման անցած ուղու վերաարժևորումն է, գրանցված հաջողությունների ու առկա խնդիրների, ինչպես նաև հետագա քայլերի քննարկումը: Մասնակիցներն իրենք հնարավորություն կունենան մշակել առաջիկա տարիների աշխատանքային ու ռազմավարական պլանը՝ հույժ կարևոր ներդրում ունենալով շարժման հետագա ծավալման ու ընդլայնման գործում:
Երկօրյա հանդիպմանը ներկա կլինի «Սերբիայի Սևազգեստ Կանայք» շարժման ներկայացուցիչը, ով կներկայացնի շարժման գործունեությունը Սերբիայում, կկիսվի փորձով ու գիտելիքներով: Նախատեսվում է նաև հանդիպում Հայաստանյան հասարակական կազմակերպությունների ու քաղաքացիական ակտիվիստների հետ, ովքեր «Սերբիայի Սևազգեստ Կանայք» շարժման ներկայացուցչի հետ կքննարկեն ողջ աշխարհում և մասնավորապես երկու երկրներում առկա իրավիճակը խաղաղության հաստատման գործընթացում կանանց դերի ներգրավվածության տեսանկյունից, վեր կհանեն կնոջ մասնակցությունը խոչընդոտող գործոնները, հարցադրումներ կանեն և կփորձեն առաջարկել լուծումներ: